08/27 01:19

قرون مضت على بدء ظهور الزجاج المعشق، ذلك الأرث التاريخي والفني الذي ظل شاهدًا على حقب زمنية متتالية، استخدمه الفن الإسلامي في زخرفة قباب ومساجد عديدة بالأشكال الهندسية الدقيقة في ألوانها وتصميماتها، بينما عرفت نوافذ الزجاج المعشق بالكاتدرائيات والكنائس في أوروبا بـ«إنجيل الفقراء»، بعدما سجلت تلك النوافذ تعاليم الإنجيل في الوقت الذي لم يعلم فيه الفقراء القراءة والكتابة.

قطع صغيرة من الزجاج سجلت تاريخًا ظل باقيًا برغم رحيل من جمعه، ومضى سنوات على ظهوره، «لسه الزبون بتاع الزجاج المعشق اليدوي موجود لأنه بقى يدخل في شغل الديكور، ومفيش بيت أو فيلا أو قرية سياحية إلا وداخل فيها شغل الزجاج، لأنه بيندمج مع كل الخامات سواء جبس أو حجر أو خشب أو فخار»، هكذا أكد مختار سعد من خلال عمله بالزجاج المعشق ومشتقاته، منذ أكثر من 25 عامًا برغم دراسته التجارة بالمرحلة الجامعية.

وتختلف أنواع الزجاج المعشق وأشهرها الزجاج الملون المعشق بالجبس، والكريستال المعشق بالرصاص، والزجاج المشكل والملون داخل أفران معينة، والذي تختلف مراحله حسب الألوان، وزجاج الموازيك أو«الفسيفساء» أحد أقدم أنواع الشغل، بحسب سعد، الذي أضاف «فيه نوع شغل بيكون بالحفرعلى الزجاج من الخلف بعمق معين لغاية ما نوصل للشكل المطلوب».

وأوضح سعد: «أي شغل يدوي بيأخد وقته لأنه مش ماكينات وكله قايم على العنصر البشري، وحساب التكلفة فيه عادة بيكون بالمتر المربع حسب نوع الشغل والتصميم وكمية ودقة الشغل وتتراوح الأسعار في الكريستال من 1800 إلى 2000 جنيه، وأسعار الألوان من 2300 إلى 2700 جنيه، ويقدر سعر شغل الفرن بالقطعة لأنه يحاسب كقطع فنية زي تابلوهات الجبس المعشق اللي سعره بيوصل 1500 جنيه».

ويشير سعد: «يستغرق تنفيذ المتر المعشق وقت كبير، وعشان أنفذ شغل معشق حتة حتة بتتقطع وتتجمع وتتلون لغاية ما توصل للشكل النهائي اللي بيكون بدأ وأنتهى بقطعة، ومتر الزجاج المعشق بيأخد 3 أيام لأنها بتمر بـ 6 مراحل هي التجهيز والتصميم والطبع على الزجاج والتقطيع والتجميع والتثبيت».

وتعد أشهر خامات الزجاج المعشق هي سبكترا وويزما وأرمسترونج وزجاج الشفافيات، «لكن المعشق معرف عند الزبون أما ملون أو كريستال وليهم تاريخ، برغم أنه بقى بيدخل في التصميمات المودرن، وزمان كان الرصاص نازل كبس على الزجاج لكن دلوقتي الرصاص بيبقى عود وبيتم تطوعيه على الزجاج بحيث يوصل لشكله النهائي».

الزجاج المعشق.. القطع الفنية التى عُرفت بـ «إنجيل الفقراء»

الزجاج المعشق.. القطع الفنية التى عُرفت بـ «إنجيل الفقراء»

الزجاج المعشق.. القطع الفنية التى عُرفت بـ «إنجيل الفقراء»